Leipziger Gerüchteküche - Das Mensa-Blog

Jae, hier is Besteckfach Inlaufrichtung, ich hab da ä Proplehm. Nor.
...
Wo isch wohn', das dud jetze ooch nüscht zur Sache beidrachn, aber Zentrum-Wesd, wenn des wissn willst.
...
Das hat ehr so middn Bauschdelln zu dun. Da is ja die Hargortschdrahse, nor, die is ja so geschberrd. Also, so zue, nor. Also, off enor Seide.
...
Das Proplehm? Ja, und da is mir ja heude offgefalln, dass da ganz viele Audofohror eenfach reingefohrn sinn. Also, weeßte wie, in die eischndlisch zue Hargordschdrahse. Und das gab da ä mäschdschn Schdau, nor. Da wo die Piplodeg is, also die die Albordinae, nor, uns Gerischd und soe. Die mussdn ja alle wiedor drehn. Sackgasse, weesde wie? Weschn dor Bullizei und die Boller da am Gonsulahd. Wie die Bleedn, gloobsde?! Die Gennzeischn, sachsch dir, gee L dabei.
...
Also, so was bleeds habsch lange nimor gesehn. Aber ich due misch wundorn, weil die ham da beschdimmd die Schildor zur Seide gedan, nor. So Raudis odor Huhligäns, oder wie och immer die heesn. Und so ä säggsi Feierahmd-Schdau, nor, das is ja ooch was Genaues, nor, weesde wie.
...
Ach soe, sie wolln da jetz nüschd machn? Geen Ardiggl?
...
Na, hörn se mal. Die schdandn da beschdimmd ne Fördlschdunde rum, nor, also ne Fördlschdunde längor als eh scho nei ins Zendrum oder ooch raus aus dor Siddi, nor.
...
Was ische damid zu dun hadde? Nor, isch war midm Fohrrod da. Nor.
...
Nöe, isch schdand da nur so rum, nor.
...
Nee, ohne Gissn offm Fensdorbredd. Off dor Schdrahse. Kwadsch, offm Fuhswesch meensch dor.
...
Abor isch hab ooch sogar was gegnibbsd. Sollsch ma die Bildor mehln?
...
Gee Indresse?
...
Nor, tschüssie.

(Da hamse misch abor sowas von abgewürscht, jetz, nor, und ische wollde den' doch nur ma sachn, was hier so laufn dud. Oder och ni. Und isch meene, Bauschdelln, nor, die ham wor ja genuch, nor.)